РУСКИ КЕРЕСТУР – Тогорочна, штварта манифестация „Днї керестурскей паприґи” урядово отворена всоботу, 15. авґуста пополадню, а на бини у центре валалу отворел ю заменїк предсидателя Општини Кула Велибор Милоїчич. Вон повинчовал орґанизатором на винїмковей манифестациї, та визначел же Општина Кула, єй Аґенция за розвой и Туристична орґанизация того року допринєсли же би ше ю подзвигло на висши уровень, а то обецал и за наступни роки.
Пред тим, спред орґанизатора – Здруженя паприґарох Руского Керестура „Капсикум анум” – шицких нащивительох привитал його предсидатель Владимир Варґа, як и предсидатель Совиту Месней заєднїци Руски Керестур Владимир Олеяр, котри подзековал орґанизатором на вельким труду хтори укладаю до орґанизованя тей манифестациї, та пожадал же би керестурска паприґа була бренд нє лєм унашей держави, алє и ширше.
Олеяр окреме привитал и госцох – народни посланїци з кулскей општини др Лїляну Бероня и Олену Папуґа, заменїка и помоцнїка предсидателя Општини Кула Велибора Милоїчича и Марка Пешича, та делеґацию зоз Свиднїку, зоз Словацкей, на чолє з городоначалнїком Яном Голодняком.
Бешедуюци на отвераню, Голодняк висловел задовольство же су поволани на тоту манифестацию, а медзи иншим визначел же на гуґл-глєдачу пренашол же, як гварел – керестурска паприґа найлєпша на швеце.
„Днї керестурскей паприґи” всоботу нащивел и амбасадор Исламскей републики Пакистан, Його екселенция Ариф Махмуд, котри на свойо жаданє, а на поволанку Саманти Рац Стиїлькович, нащивел Руски Керестур. Амбасадор пообиходзел виложени штанци, нащивел и керестурску катедралну церкву, а представителє Месней заєднїци и Здруженя паприґарох го упознали з Керестуром и своїма активносцами.
Пред одходом, амбасадор Ариф Мехмуд ше з поруками мира и любови озвал и ґу шицким нащивительом манифестациї, виражуюци задовольство же пришол до Керестура и упознал Руснацох, о котрих будзе преношиц найкрасши глас.
Манифестацию „Днї керестурскей паприґи“ орґанизовали члени Здруженє паприґарох „Капсикум анум”, Конїцки клуб „Русин”, Здруженє женох „Байка” и Здруженє ремеселнїкох и приватних поднїмательох, а з потримовку вецей месних здруженьох, орґанизацийох, установох и поєдинцох.
Днї керестурскей паприґи финансийно потримали Покраїнски секретарият за польопривреду, водопривреду и лєсарство, Општина Кула и Месна заєднїца Руски Керестур, та коло 38 спонзоре.
Вецей фотоґрафиї у окремней ґалериї на правим боку нашого сайту.
