На „Дньох Миколи М. Кочиша” у Дюрдове означени вецей ювилеї

автор бас
1.3k Опатрене

ДЮРДЬОВ – У рамикох „Дньох Миколи М. Кочиша” вчера у ОШ „Йован Йованович Змай” у Дюрдьове означени три рочнїци наших преднякох родом з того места – 100 роки народзеня учителя и писателя Якима Олеяра, 80 роки народзеня виховательки Наталиї Голуб и 70 роки народзеня поетеси Амалиї Балоґ Ґерлах.

После привитного слова директорки Школи Мариї Тртич, биоґрафию Якима Олеяра и Амалиї Балоґ Ґерлах пречитала наставнїца руского язика у дюрдьовскей Школи Мария Самарджич, а о Наталиї Голубовей бешедовала заступнїца Дружтва за руски язик, литературу и културу Ирина Папуґа. Часц програми були и рецитаторски и музични точки, котри пририхтали школяре висших и нїзших класох у хторих ше виучує руски язик, зоз своїма наставнїцами и виховательку.

О виданьох Дружтва за руски язик, хторе зоз свою Секцию у Дюрдьове було орґанизатор програми, бешедовала Ирина Папуґа, а виданя придати и до библотеки дюрдьовскей Школи.

На концу найвреднєйшим читачом, школяром од другей по осму класу, додзелєни припознаня з меном Амалиї Хромиш, тиж родом з Дюрдьова, а припознаня з меном Якима Олеяра достали поєдинци и институциї котри допринєсли роботи у култури, образованю и пестованю руского язика.

ПОВЯЗАНИ ТЕКСТИ