РУСКИ КЕРЕСТУР – Тогорочни, 47. Драмски мемориял Петра Ризнича Дядї у Руским Керестуре будзе отримани отримани од 17. по 25. април, як и дотераз у орґанизациї Дому култури, заключене на вчерайшей схадзки Орґанизацийного одбору Мемеориялу.
На смотри нашей театралней творчосци буду виведзени седем представи за старших и шейсц за дзеци, у продукциї Руского народного театру „Петро Ризнич Дядя”, Драмского студия „АРТ” керестурского Дому култури, КУД „Яким Гарди” з Петровцох, з Горватскей, РКЦ Нови Сад, Руского КУД „Др Гавриїл Костельник” з Кули, КПД „Дюра Киш” зоз Шиду, КУД „Тарас Шевченко” з Дюрдьова, а по традициї, на Мемориялє будзе госцовац и представа з Општинскей смотри драмскей творчосци кулскей општини.
Окремни госц тогорочного Драмского мемориялу будзе ансамбл русинского професийного Театру Александра Духновича з Пряшова, хтори зоз своїма двома представами 25. априла завре тогорочни фестивал – пополадню з представу за дзеци, а на вечар з представу за старших. Госцованє ТАД з Пряшова будзе витворене дзекуюци Спорозуменю о медзиреґионалним сотруднїцтве медзи АП Войводину и Пряшовским самоуправним крайом у Словацкей.
Под час Мемориялу будзе вистава маскох Милоша Лишанина Пифкия, котри ше того мешаца з Ужица приселєл до Керестура, а єден дзень будзе отримани Округли стол з тему „Терашнї стан у театралней дїялносци Руснацох”.
Можлїве же дзепоєдни представи за дзеци орґанизовано приду патриц и школяре котри факултативно виучую руски язик у наших местох, на инициятиву Одбору за образованє Националного совиту Руснацох.
Понеже можлїви одредзени дополнєня, конєчни репертоар Мемориялу будзе утвердзени початком шлїдуюцого тижня.