КОЦУР – Школяре осмей класи коцурскей Основней школи „Братство єдинство” вчера ришовали перши з трох тестох на Закончуюцим испиту за упис до штреднїх школох – з мацеринского язика. Закончуюци испит у Коцуре покладаю 47-еро маломатуранти.
Школяре у Коцуре тести ришую у физкултурней сали од 9 до 11 годзин и, як дознаваме у Школи, шицко прешло у порядку. Школяре после ришованя були задовольни и векшина ше зложела же резултати буду задоволююци, гоч тест бул чежши як тоти на хторих вежбали.
Нєшка школярох чека тест з математики, од хторого, як гваря, найвецей поцерпаю, а на ютре буду ришовац комбиновани тест – з биолоґиї, физики, хемиї, историї и ґеоґрафиї.
З трох тестох мож витвориц найвецей 30 боди, док ше остаток бодох здобува на основи посцигнутого успиху под час школованя.