ЧЕРВИНКА – У Доме култури у Червинки нєшка будзе отримана Зонска смотра музично-фолклорней творчосци за старших (и стилизованого и жридлового фолклору), а на Смотру ше найвецей ансамбли пласовали з местох кулскей општини.
Дом култури Руски Керестур на Зонскей смотри участвує з окремним блоком у хторим два танци – Виводзацкого ансамблу „Вечар на валалє” и Ґрупи ветеранох „Ильков танєц”, та Венчик руских виходнярских шпиванкох у виводзеню Хлопскей жридлова ґрупа з и два народни шпиванки у виводзеню Мишаней жридловей ґрупи.
Як окремни змагательни точки, спред Дому култури Руски Керестур на нєшкайшей Зонскей смотри з по двома шпиванками наступя и Дзивоцка, Женска и Хлопска шпивацка ґрупа, та Тамбурови оркестер з Венчиком руских шпиванкох. Фахова руководителька танєчнїкох Ґабриєла Саянкович, а оркестру и шпивацких ґрупох Юлиян Рамач Чамо.
На Зонскей смотри з нашима народнима шпиванками наступи и Женска шпивацка ґрупа Руского КУД „Др Гавриїл Костельник” з Кули, под фаховим руководительством Еуфемиї Планкош.
З кулскей општини на Зонску смотру ше пласовали и Дом култури Сивец, КУД „Сербия”, Мадярски културни центер „Непкер”, КУД „Иван Сенюк” и КУД „Дурмитор”, шицки з Кули.
Смотра почина на 17 г., а селекторка хореоґрафка Слободанка Рац з Бачкей Тополї. Понеже пре скорей плановани госцованя нє шицки ансамбли нєшка можу участвовац на Смотри, селекторка их одпатри познєйше.
