ҐОСПОДЇНЦИ – Вчера, 21. новембра, на Михала по юлиянским календаре, у грекокатолїцкей церкви Святого архангела Михаила у Ґосподїнцох преславене храмовне швето – Кирбай. Архиєрейску Службу Божу предводзел грекокатолїцки владика Атанасий Орос з Мишколцу, з Мадярскей, а сослужели осемцме священїки.
Владику з Мадярскей, присутних священїкох, вирних и їх госцох привитал ґосподїнски парох о. Михаил Холошняй, котри з тей нагоди парохиянки Надїї Тур уручел Подзекованє за помоц у вирабяню церковного сайту.
Наказовал о. Мартин Деретич, котри бешедовал о значносци швета и улоги архангела Михаила, алє и других ангелох, Библиї и других християнских ознакох, окреме у нєшкайшим наглим и стресним швеце и швидкосци информацийох.
На Служби були домашнї парохиянє, госци з других местох и иножемства, як и парохиянє з дюрдьовскей грекокатолїцкей парохиї, а Кирбайску Службу возвеличали и кресцини, понеже вчера покресцени Мартин, син Ани и Любомира Дудашових з Ґосподїнцох.
Внєдзелю пред Кирбайом, по Саночним, хторе служел о. Борис Холошняй, Хор „Розанов” у ґосподїнскей церкви отримал концерт, а члени Хору шпивали и на Служби на Кирбай.