ЖАБЕЛЬ – У рамикох „Жабельских дньох” и месней слави Спасовдан, у Спортскей гали у Жаблю всоботу, 23. мая вечар орґанизовани „Вечар забави и розваги”, на хторим ше преплєтали вецей музични и танєчни жанри – сучасни и традицийни з рижних подручох Войводини и Сербиї, як и зоз Словацкей.
Участвовали културно-уметнїцки дружтва, здруженя и орґанизациї зоз жабельскей општини и госцински з Каравукова и зоз Снїни, зоз Словацкей.
Програму з гимну Сербиї отворел Хор „Пасторала” зоз Жаблю, а у мено орґанизатора, Месней заєднїци Жабель, присутних привитала Дубравка Дудич, директорка Народней библиотеки у Жаблю.
На програми участвовали и КУД „Роґаль зоз Жаблю, „Дєрдан” з Ґосподїнцох, „Прело” з Чуроґу, Здруженє родичох и хранительох „Алтуруист”, два школи за танцованє зоз Жаблю, КУД „Станиша Стошич” з Каравукова и ансамбл „Шинява” зоз Снїни, зоз Словацкей, хтори виведли народни танци и шпиванки з восточней Словацкей.