На Медзинародней науковей конференциї у Польскей и Руснаци зоз Сербиї

автор ммц
974 Опатрене

СЛУПСК (ПОЛЬСКА) – Од нєшка, та до 26. септембра у Слупску (Польска) ше отримує Пията медзинародна наукова конференция „Лемки, Бойки, Гуцули, Русини – история, сучасносц, материялна и духовна култура”, хтора пошвецена 70-рочнїци висельованя Українцох з Польскей до УССР од 1944. до1946. року.

Конференцию орґанизує Институт историї и политолоґиї Поморскей академиї зоз Слупску (Польска), у соструднїцтве з Институтом политолоґиї Зеленоґурского универзитету зоз Зеленей Ґури (Польска), Українским историчним товариством у Польскей, Катедру историї политично-юридичних доктринох и историї права Зеленоґурского универзитету, Одсеком за русинистику Филозофского факултету у Новим Садзе (Сербия), Институтом народознавства Националней академиї наукох України (Львов, Україна), Факултетом историї Ужгородского националного универзитету (Україна), Катедру историї Филозофского факултету Универзитету Матеї Бели у Банскей Бистрици (Словацка), як и з Музейом українскей култури у Свиднїку (Словацка).

З нашей жеми у роботи Конференциї з рефератами участвую др Янко Рамач („Писменосц Руснацох Южней Угорскей од стредку 18. до конца 19. столїтия”), др Дюра Гарди („Историоґрафийна и публицистична творчосц епископа Дионизия Нярадия у контексту релиґийного и националного идентитету бачванско-сримских Руснацох”), Александер Мудри („Назви продуктох з конопи у язику Руснацох Войводини”), Саша Сабадош („Дїялносц Секциї за Русинох Союзу културно-просвитних дружтвох 1948-1952”), Велимир Паплацко („Вуковар – насилне висельованє Руснацох и Українцох 1991. року”), док Микола М. Цап („Митрополит Андрей Шептицкий и Руснаци и Українци Югославиї/Сербиї”) пре здравствени причини нє могол одпутовац.

По законченю Конференциї, шицки роботи буду обявени у окремним зборнїку.

ПОВЯЗАНИ ТЕКСТИ