НОВИ САД – Нєшка у просторийох Новосадского сайму почина Медзинародни саям “ЛОРИСТ”, у чиїх рамикох од 28. септембра по 2. октобер будзе 49. Медзинародни саям лову, риболову у спорту, 6. Саям лєсарства, 23. Медзинародни саям гортикултури и 24. Медзинародни саям „Еко-швет”. У истим просторе, алє од 29. септембра по 1. октобер, пририхтани и 49. Медзинародни саям туризму, док од 30. септембра по 2. октобер будзе 7. Медзинародни саям конярства и серсану, та Саям спорту.
Наявене же на тогорочних саймох, вєдно наволаних „ЛОРИСТ”, будзе вецей викладачох як влонї, а порихтани и вецей тематски вистави. Тиж орґанизовани и вецей турнири, спортски змаганя, промоциї и фахово сходи.
Новосадски саям будзе отворени од 10 до 19 годзин, уходнїца 300, а за колективни нащиви 200 динари. Фамелийни дзень, кед з єдну уходнїцу годна войсц фамелия з дзецми до 16 роки, будзе на соботу 1. октобра.
Школяре основних школох сайми задармо можу нащивиц по 30. септембер и на нєдзелю, 2. октобра. Уход им будзе оможлївени през Аулу, а маю указац школярску кнїжочку.