БИКИЧ – На нєдзелю, 25. октобра, у Основней школи „Сримски фронт”, його Подручним оддзелєню у Бикичу, на 17 годзин будзе отримани литературно-музични вечар з нагоди означованя 106. рочнїци народзеня учителя и писателя Михала Ковача, котри бул перши учитель у бикичскей школи.
Програму Културно-просвитне дружтво „Иван Котляревски” орґанизує вєдно зоз Секцию Дружтва за руски язик, литературу и културу у Бикичу, а як за Рутенпрес гварел предсидатель КПД Деян Бобаль, у нєй участвую школяре котри ходза на виборну наставу руского язика, члени спомнутей секциї, як и Мишана шпивацка ґрупа КПД „Иван Котляревски”.
За тоту нагоду будзе отворена и вистава малюнкох учительки у пензиї Драґици Живкович Лели зоз Шиду.