ВУКОВАР – На нєдзелю, 31. мая, у Републики Горватскей буду отримани виберанки за членох радох и представительох националних меншинох у єдинкох локалней и подручней (реґионалней) самоуправи у хторих, по утвердзених законских предписаньох, припаднїки меншинох и дотераз виберали своїх представительох.
Руска национална меншина до Ради на подручу Вуковарско-сримскей жупаниї ма право вибрац 25 членох, до Городскей ради Вуковар 15 членох, до своїх радох у општинох Боґдановци (дзе Петровци) и Томповци (дзе Миклошевци) по 10 членох, у Заґребе вибере свойого представителя, як и представителя на подручу Осиєцко-бараньскей жупаниї. У спомнутих местох лїстини кандидатох-Руснацох придати на час до одвитуюцих орґанох, а право гласа маю шицки полнолєтни жителє з одредзеного подруча, кед ше вияшнєли як Руснаци.
Буду то штварти виберанки за припаднїкох националних меншинох у Републики Горватскей. Держава законски оможлївела пестованє националней култури, а од самих припаднїкох меншинох завишело и завиши кельо то вихасновали, односно хасную.