ПЕТРОВЦИ (ГОРВАТСКА) – З рубаньом майского древка пред Етноґрафску збирку у Петровцох пияток, 3. юния, почала централна манифестация култури Руснацох Републики Горватскей – 43. „Петровски дзвон”.
Члени КУД „Яким Гарди” з Петровцох приказали обичай рубаня майского древка, хторе ше закоповало пред обисцом дзивки котра ше, звичайно, истей єшенї одавала.
Майске древко ше закоповало вноци пред 1. майом, а валяло концом мешаца. Попри на тих просторох, тот обичай познати и у других славянских жемох штреднєй Европи, алє и у Австриї и Нємецкей.
Медзи Руснацами у Горватскей зачувани є у Петровцох, алє тераз уж лєм як фоклорни традицийни елемент, хтори од забуца чува КУД „Яким Гарди”.
Всоботу у рамикох фестивалу орґанизовани вистави, промоциї кнїжкох, литературни вечар, а вчера музично-фолклорни манифестциї „Петровски дзвончок” и „Петровски дзвон”.
Тогорочни „Петровски дзвон” отримани у рамикох означованя 185-рочнїци приселєня Руснацох до Петровцох и Горватскей, 180-рочнїци грекокатолїцкей парохиї у Петровцох и 45-рочнїци часопису „Нова думка”.