НОВИ САД – На Новосадским сайме 28. и 29. октобра будзе отримани перши новосадски „Октоберфест”, на хторим нащивителє годни коштовац велї файти пива, австрийски и нємецки колбаси, переци, а у музичней програми наступя Звонко Боґдан, ґрупи „Фрайли”, „Штикли и виклери”, „Ґифт”, „Ортодокс Келтс”, „Ничим изазван” и други.
З отримованьом тей манифестациї, по углядзе на популарни традицийни нємецки „Октоберфест”, орґанизаторе жадаю привитац привреднїкох, котри у опущеней атмосфери вичераю искуства.
– Контактовали зме з приватнима компаниями и иновативнима поєдинцами и вериме же „Октоберфест” будзе порив за нови подобни проєкти и достанє свой простор на тарґовищу – гварел ґенерални директор Новосадского сайму Слободан Цветкович.
Уходнїци за „Октоберфест” у предпредаваню мож купиц за 200 динари, а на дзень Фестивалу уходнїца кошта 300 динари, наявели орґанизаторе.
У дньох пред отримованьом манифестациї, на Площи шлєбоди будзе и промотивни щтанд на хторим шицки годни коштовац пиво и переци. Вецей информациї о Фестивалу мож опатриц на сайту https://www.oktoberfest2016.rs/