КОЦУР – На Вельку Матку Божу Коцурци означи два значни ювилеї – 250 роки грекокатолїцкей церкви и 100 роки приселєня часних шестрох служебнїцох до Коцура.
Означованє ювилею церкви у Коцуре почнє на пияток, 28. авґуста, на Кирбай, з отвераньом колективней подобовей вистави з назву „Под покровом Пресвятей Богородици”, хтора у церковней сали будзе отворена на 9,15 годзин. Потим у церкви Успения Пресвятей Богородици на 10 г. будзе Архиєрейска Служба Божа.
Означованє ювилею часних шестрох служебнїцох почал пондзелок, 24. авґуста, з виставу хтора провадзи историю живота шестрох служебнїцох у Коцуре, од самого дня приходу по нєшка. Виставу годно опатриц и на пияток, а Архиєрейска Служба на Кирбай тиж будзе пошвецена и 100-рочнїци приселєня часних шестрох служебнїцох до Коцура.
На соботу, 29. авґуста, у Церковней сали од 10 до 14 годзин домашнї буду дочековац госцох, медзи нїма и з Мучоню, з Мадярскей.
На 19 годзин у валалскей библиотеки будзе отримана промоция моноґрафиї коцурскей грекокатолїцкей церкви „Чувар вири, язика и руского народу”, а на 20 годзин у велькей сали Дому култури будзе „Шветочна академия 250”, на хторей, попри других, буду участвовац и госци з Мучоню.