ОСИЄК (ГОРВАТСКА) – У орґанизациї КУД Руснацох Осиєк, а з финанцийну допомогу Совиту за национални мешини Републики Горватскей, Осиєцко-бараньскей жупаниї и вецей спонзорох, у Осиєку од 17. по 19. юний отримана 9. Подобова колония. На Колониї участвовали 7 маляре з Войводини и Горватскей, котри фундусу КУД Руснацох Осиєк зохабели красне число малюнкох.
З Войводини на Колониї участвовали Лидия Барна, Тамара Барановски, Серафина и Силвестер Макайово и Владимир Дороґхази, а з Горватскей Мирослав Одавич и Роберт Ерделї.
Колонию заварла предсидателька КУД Руснацох Осиєк Агнетка Балатинац, котра поєдинєчно представела малярох и малюнки намальовани на Колониї, а потим ушлїдзело друженє членох домашнього КУД и малярох, на хторим тамбурови оркестер и члени хору Дружтва одшпивали даскельо познати руски шпиванки.
На завераню Колониї присуствовала и предсидателька Союзу Русинох РГ Дубравка Рашлянин, котра и член КУД Руснацох Осиєк.