ВЕРБАС – Централна шветочносц з нагоди Националного швета Руснацох у Сербиї всоботу, 17. януара у Вербаше почала з турниром у столним тенису. Змаганє, у рамикох Спортских бавискох „Яша Баков”, отримане у просторийох вербаского Културно-просвитного дружтва „Карпати”.
На турнире участвовали 25 бавяче зоз Змаєва, Коцура, Фекетичу, Дюрдьова и Вербасу.
Турнир нащивел член Општинскей ради Вербас задлужени за спорт Йован Ковачевич, котри з тей нагоди, медзи иншим, надпомнул же спортска секция КПД „Карпати” вше активно участвує на числених спортских манифестацийох у општини. Винчуюци швето визначел же му окреме мило же тото вельке збуванє почало зоз спортом.
Бевело ше по куп-системи, на випадованє, а побиднїк бул бавяч котри достал два сети, хтори ше бавело до 11 поени.
Перше место освоєл Михайло Киш з Дюрдьова, друге Мартин Копривица, треце Велько Вуячич, а штварте Александар Сабо, шицки з Вербасу.
После змаганя, учашнїком прирхтани полудзенок – традицийна пасуля по хторей, як надпомнул орґанизатор змаганя Владимир Мученски, Дружтво „Карпати” познате.