НОВИ САД – За початок нового школского рока дзеци достали и нову „Заградку”, и то двочисло – за авґуст и септембер – на 28 бокох.
На рамикох фотоґрафиї з „Червеного пупча” и Лєтнєй школи руского язика отриманей у Попрадзе, у Словацкей, а обсяжнєйше о тих подїйох „Заградка” пише на трох бокох.
У рубрики „Фото-памятки” читаче дознаю о лєтнєй манифестациї „Под корунами на Штранду” на дунайскей плажи у Новим Садзе, дзе були и роботнї руского язика, а у тей рубрики представени и наймладши коцурски танєчнїки на „Коцурскей жатви”.
Привитну писню за школярох першей класи ОШ того року написала писателька Ивана Нешич, а стихи прешпивани и видруковани на шицких язикох на хторих ше одвива настава у основних школох у Сербиї.
У литературней часци часопису приповедки и писнї наших писательох Евґения Чакана, Ксениї Палатинус и Серафини Макаї, як и преложени твори Неделька Терзича, Лїляни Крстич и Слободана Вукановича.
У „Малей заградки” стихи Миколи Скубана, Михайла Ковача и Меланиї Павлович, а цали тот школски рок у додатку за наймладших будзе нова рубрика „Наша азбука”, дзе будуци школяре годни рисовац поняца на початни букви.
„Заградка” на 26. боку обявела и мена наградзених школярох за найкрасши литературни и подобово роботи обявени у тим часопису у прешлим школским року.