КОЦУР – У Велькей сали Месней заєднїци (МЗ) у Коцуре вчера означене националне швето Руснацох. Музично-литературну академию орґанизовала Подручна канцелария (ПК) Националного совиту (НС) Руснацох у Коцуре, а акцент бул на образованю по руски, понеже то найвекши терашнї проблем Руснацох у Коцуре.
На програми присуствовали и предсидатель Општини Вербас др Братислав Кажич, подпредсидателька Скупштини општини Вербас Ксения Бенце, подпредсидатель НС Руснацох Микола Шанта, предсидатель Вивершного одбору НС Желько Ковач, предсидатель МЗ Желько Бєлан, члени одборох НС Весна Раґаї Цап, Серафина Яґлица, Ксения Бесерминї и Микола Цап, директорка Основней школи „Братство єдинство” Славица Байор, коцурски грекокатолїцки парох о. Владислав Рац, православни парох о. Здравко Бойович, предсидателє коцурских здруженьох и гражданє Коцура.
Присутних привитал предсидатель ПК НС Микола Ґубаш, а швето повинчовал и предсидатель Општини Братислав Кажич. Директорка Школи Славица Байор бешедовала о тогорочним означованю 250-рочнїци образованя у Коцуре, визначуюци континуитет образованє на руским язику през шицки тоти роки, та наглашела же ше наздава же так будзе и надалєй. О истим проблему познєйше бешедовали и Желько Ковач и о. Владислав Рац.
У музичней часци програми участвовали Димитрий Цап, котри на ґитари виведол єдну композицию, а потим провадзел шпивача Михайла Будинского. На програми Микола Шанта, Наташа Медєши, Мелания Мали и Марина Кухар пречитали часци нєобявених творох Гавриїла Костельника, а Серафина и Силвестер Макайово читали свойо роботи. По законченю програми розгварка и друженє предлужене на коктелу.
На ютре, 17. януара, у Коцуре будзе отримана ище єдна програма означованя националного швета Руснацох, хтору на 19.30 годзин у Доме култури орґанизую Роботна єдинка Коцур Културного центру Вербас, Коцурске здруженє младих (КУМ), КПД „ДОК”, Етно-клуб „Одняте од забуца” и Месни одбор Рускей матки. На програми буду висловени пригодни слова и стихи, и виведзена представа „Нинджа у тензиї 2”.
