На Радио „Кулска комуна” и надалєй и по руски

автор зам
759 Опатрене

КУЛА – Радио „Кулска комуна” Информативно-пропаґандного центру (ИПЦ) Кула и после приватизациї предлужи з дотерашню програму каждодньового радио-информованя по сербски, руски и мадярски, раз тижньово и по українски, а раз мешачно по нємецки. Ґу тому, и у новинох „Кулска комуна”, хтори виходза раз мешачно, и надалєй буду и додатки на руским и мадярским язику – потвердзел вчера за Рутенпрес нови власнїк ИПЦ Радован Ковач з Кули.

Радован Ковач млади привреднїк (1984), власнїк фирми „Херреро” д.о.о. реґистрованей за тарґовину на велько, ИПЦ Кула купел 31. авґуста за 3 500 еври як єдини учашнїк на лицитациї. После потребних законских процедуралних роботох, контрак о предаваню капиталу з Аґенцию за приватизацию годзен буц подписани найвироятнєйше до конца септембра, з чим и службено постанє власнїк ИПЦ Кула.

Нови власнїк за Рутенпрес у телефонскей розгварки потвердзел же, кед слово о информованю на язикох меншинох, воно остава и надалєй, и то нє лєм у тей пейцрочней обовязки же ма затримац застату роботу, алє, як наглашел – и после того.

Гварел же плануєм основац и ТВ, дзе би тиж було информованє и на язикох меншинох, а попри терашнїх штирох стаємно занятих, ма намиру прияц и нових, младих людзох.

Вецей о другей приватизациї ИПЦ Кула годно пречитац у шлїдуюцим чишлє „Руского слова”.

1-IPC-02

ПОВЯЗАНИ ТЕКСТИ