РУСКИ КЕРЕСТУР – На 55. Фестивалє рускей култури „Червена ружа” предвидзена и богата провадзаца програма, та так на соботу, 25. юния, на 10 годзин коло Майсторского, Дому пензионерох и Дому младежи почнє Керестурски саям и будзе тирвац цали дзень.
Попри штандох з рижнима продуктами, на Сайме и практично будзе представене колєсарске ремесло, а орґанизаторе планую и креативни роботнї за дзепоєдни други ремесла.
У Спортскей гали, тиж на 10 г., почнє Медзинародни турнир у одбойки у рамикох Спортских бавискох „Яша Баков”, на хторим, попри наших, предвидзене участвованє и екипох з України, з Перечину, як и з руских местох у Горватскей.
Першираз на „Червеней ружи”, а вообще и у Руским Керестуре, у Спортскей гали буду спортски змаганя дзецох и особох з окремнима потребами – з Керестура, Кули и Коцура. Змаганє у Спортскей гали почнє пополадню, после турниру у одбойки.
Пияток и всоботу у дворе Школи „Петро Кузмяк” на спортских теренох буду два шатри и окремни погосцительни простор за розвагу после програмох, дзе будзе грац „жива музика”. За тоту часц Фестивалу задлужена Младежска орґанизация „Пакт Рутенорум”.
На соботу у просторе за розвагу за учашнїкох и публику у штирох котлох будзе варени паприґаш и пасуля – гварене на вчерайшей схадзки Орґанизацийного и Програмного одбору Фестивалу рускей култури „Червена ружа”.
