РУСКИ КЕРЕСТУР – На 55. Фестивалє рускей култури „Червена ружа” предвидзена и богата провадзаца програма, та так на ютре, 25. юния, коло Майсторского дому на 10 годзин почнє Керестурски саям и будзе тирвац цали дзень.
Попри штандох з рижнима продуктами здруженьох женох, привреднїкох и других, на Сайме и практично буду представени вецей стародавни ремесла, цо почнє коло 11 г., а наявене же коло 15 г. будзе преглашени и найлєпши колач на грубо з маком.
У Спортскей гали, тиж на 10 г., почнє Медзинародни турнир у одбойки у рамикох Спортских бавискох „Яша Баков”, на хторим, попри наших, предвидзене участвованє и екипох з України, з Перечину, як и з руских местох у Горватскей.
Першираз на „Червеней ружи”, а вообще и у Руским Керестуре, у Спортскей гали буду спортски змаганя дзецох и особох з окремнима потребами – з Керестура, Кули и Коцура. Тото змаганє у Спортскей гали почнє на 16 годзин.
Пияток и всоботу у дворе Школи „Петро Кузмяк” на спортских теренох буду два шатри и окремни погосцительни простор за розвагу после програмох, дзе будзе грац „жива музика”. За тоту часц Фестивалу задлужена Младежска орґанизация „Пакт Рутенорум”.
На соботу у просторе за розвагу за учашнїкох и публику у котлох будзе варени паприґаш и пасуля.