РУСКИ КЕРЕСТУР – Цалодньови Семинар за просвитних роботнїкох котри наставу тримаю по руски, у орґанизациї Националного совиту (НС) Руснацох, отримани всоботу, 3. децембра у рускокерестурскей Школи „Петро Кузмяк”, алє на нїм участвовали лєм шейц з дзешец приявених просвитних роботнїкох з наших местох. Як дознава Рутенпрес, вироятна причина за слабше одволанє то же Семинар нє акредитовани, так же ше за участвованє на нїм доставало барз мале число бодох.
Учашнїкох з Дюрдьова и Керестура и викладачох, професорох з Оддзелєня за русинистику Филозофского факултету – проф. др Янка Рамача и ма Александра Мудрия, у мено домашнїх привитала директорка Школи и членїца НС Хелена Пашо Павлович, а у мено орґанизатора секретар НС Таня Арва Планчак.
Преподаванє о визначних особох у просвитним, културним, националним и привредним живоце Руснацох отримал професор др Янко Рамач, котри бешедовал о штирох особох з дзеветнастого вику – учительох Петрови Кузмякови и Михайлови Врабельови, активистови Ґаборови Ґвожджакови, та о библиотекарови Михайлови Мункачийови.
О уплїву сербского на руски язик и о польодїлскей лексики, викладаня з роботню на Семинаре отримал ма Александар Мудри.
