ШИД – Вчера у сали Културно-образовного центру Шид отримани перши дзень Општинскей смотри рецитаторох, на хторей ше змагали 55-еро рецитаторе штреднього возросту (школяре висших класох ОШ), медзи нїма и з писнями по руски.
Школяр седмей класи ОШ „Бранко Радичевич” з Бачинцох Божидар Загорянски на змаганю участвовал з писню Дюру Папгаргая „За нїх мало и сто глави”, школяр шестей класи Матия Шеремет рецитовал тиж Папгаргайову писню „Ефикасна терапия”, а школярка осмей класи Мина Шеремет (на фотоґрафиї) участвовала з писню Миколи М. Кочиша „Мацери при кудзелї”. Шерметово школяре ОШ „Бранко Радичевич” зоз Шиду.
Нашо рецитаторе ше нє пласовали на висши уровень змаганя, а Матия Шеремет похвалєни.
Нєшка на Општинскей смотри наступя змагателє у конкуренциї младшого и старшого возросту, дзе у младшим возросту (школяре нїзших класох ОШ) наступи и Уна Шеремет, школярка першей класи ОШ „Бранко Радичевич” зоз Шиду, з писню Меланиї Павлович „Жимно було”. У конкуренциї штредньошколцох и студентох нєт рецитаторох по руски.