РУСКИ КЕРЕСТУР – На соботу, 28. марца, будзе порядна, штварта схадзка Националного совиту (НС) Руснацох у тим зволаню.
На дньовим шоре 29 точки, а члени Совиту найвецей буду бешедовац о звитох о роботи, финансийних звитох и планох роботи як самого НС, так и установох и орґанизацийох хторим є снователь, лєбо соснователь.
Предвидзени и вименки Статуту НС, формованє Пододбору за управу и предписаня и вибор його членох, вибор єдного члена Одбору за службене хаснованє язика и писма, та приношенє одлукох вязаних за подручни канцелариї НС.
На дньовим шоре и потвердзованє дзепоєдних одлукох Вивершного одбору НС вязаних за културу, як и за даванє думаня о кандидатох за директорох школох у Новим Садзе и Савиним Селу. Медзи иншим, мала би буц принєшена и одлука о местох отримованя централних преславох Националного швета Руснацох од 2016. по 2018. рок.
Штварта схадзка НС на соботу будзе у просторийох Дому култури Руски Керестур на 10 годзин.