НОВИ САД – Длуго обчековани сход чолнїкох партийох хтори творя векшину у Скупштини Войводини – предсидателя Демократскей странки (ДС) Бояна Пайтича, предсидателя Лиги социялдемократох Войводини (ЛСВ) Ненада Чанка и лидера Союзу войводянских Мадярох (СВМ) Иштвана Пастора отримани вчера, без конкретного резултату, крем информациї же на стреду, 4. марца, будзе отримани нови сход о функционованю власци у Покраїни.
Як сообщене з ЛСВ, чий лидер бул домашнї сходу, на вчерайшей схадзки порушани вецей значни питаня и теми и догварене же би ше розгварки предлужело на стреду.
Криза власци у АП Войводини тирва длугши час, а причина погоршани одношеня медзи ДС и ЛСВ з єдного, и СВМ з другого боку. Медзи иншим, СВМ дальшу потримовку Покраїнскей влади условел з врацаньом нєдавно зменєней директорки „Войводиналєсох” Марти Такач на тоту функцию.
Тоти три странки нєшка у Скупштини Войводини, хтора ма 120 членох, маю векшину од 66 посланїкох – 49 демократох, 10 лиґашох и седем зоз СВМ.