КОЦУР – На першей тогорочней схадзки Управного одбору (УО) Културно-уметнїцкого дружтва (КУД) „Жатва” з Коцура, пондзелок, 9. фебруара, бешедоване о дотерашнїх, як и активносцох Дружтва у наступним периодзе.
На схадзки присуствовали 9 з 10 членох Управного одбору, котри констатовали же „Жатвов бал” бул добре орґанизовани и прешол у найлєпшим шоре. Пенєж назберани на Балє будзе потрошени на комплетованє опреми за наступи секцийох КУД.
Спомедзи планох у наступним периодзе, на УО КУД „Жатва” бешедоване о орґанизованю манифестациї „Шпиваночка”, учасци на смотри фолклору и шпивацких ґрупох, о Фестивалє „Коцурска жатва”, можлївосцох за одход на госцованє до иножемства, о наступох на наших руских фестивалох, алє и о означованю 25-рочнїци снованя Дружтва.
Направени и плани за писанє проєктох за конкурси хтори розписала Општина Вербас, а бешедоване и о пририхтованю рочней Скупштини КУД „Жатва”, хтора пошвидко ма буц отримана.