БЕОҐРАД – З нагоди Медзинародного дня мацеринского язика (21. фебруар) Канцелария за людски и меншински права вчера орґанизовала културно-уметнїцку програму на хторей присуствовали представителє националних совитох националнох меншинох, державних орґанох, институцийох, нєзависних целох, та дзеци – представителє националних меншинох, котри рецитовали на мацеринским язику. На програми участвовали и представителє Руснацох.
Директорка Канцелариї Сузана Паунович з тей нагоди додзелєла подзекованя за медийне доприношенє у промовованю людских и меншинских правох представительом 41-го медию, а 13 представителє медийох достали подзекованє за провадзенє и информованє о роботи националних совитох у 2015. року.
Право на информованє на язикох националних меншинох ше витворює на 15 язикох, а значне же би ше мацерински язик пестовало у медийох, визначела Пауновичова и додала же Влада озбильно роби на унапредзеню и защити меншинских язикох.
Вона наведла же постояци медиї треба ище баржей потримац, односно оможлївиц им капацитет у людстве и финансийох, як и же нєт потреби за обаваньом же медиї хтори информую на язикох националних меншинох буду под знаком питаня.
У Сербиї вецей як 72 000 дзеци цалу наставу слуха на мацеринским язику, а вецей як 7 000 дзеци маю предмет мацерински язик з елементами националней култури.
– У Сербиї нєшка єст вецей як 30 етнїчни заєднїци, шицки бешедую на своїм язику, а 2006. року, кед Сербия ратификовала Европску храмоту о реґионалних и меншинских язикох, превжали зме обовязку защициц 10 меншински язики – гварела Пауновичова и визначела податок же у 42-ох локалних самоуправох 11 язики маю статус службеного.
Ґенерална скупштина УНЕСКО-а 1999. року 21. фебруар преглашела за Дзень мацеринского язика, як здогадованє на студентох котри на тот датум 1952. року у Восточним Пакистану забити бо протестовали же їх мацерински язик нє преглашени за службени.