ВЕРБАС – У Вербаше нєшка почина 37. Фестивал фолклорних традицийох Войводини, хтори през три днї позбера вецей як 2 000 учашнїкох. Медзи нїма буду и шпивацки и танєчни ансамбли Руснацох, хтори ше пласовали на тоту найвисшу смотру народней традициї у Покраїни. Програми буду у Центре за физичну културу (ЦФК) Драґо Йовович, а перша почнє нєшка на 18 годзин.
Фестивал шветочно отвори предсидатель Општини Вербас др Братислав Кажич, а нєшка наступя дзецински ансамбли.
На ютре, соботу, програма почнє на поладнє, а спомедзи наших ансамблох, на ютре на Фестивалє наступя Женска шпивацка ґрупа КУД „Жатва” з Коцура и Женска шпивацка ґрупа КУД „Петро Кузмяк” з Нового Орахова.
На нєдзелю програма почина на 15 годзин, а медзи учашнїками буду и Женска шпивацка ґрупа Руского КУД „Др Гавриїл Костельник” з Кули, два шпивацки ґрупи КПД „Дюра Киш” зоз Шиду – Мишана старша и Мишана младша, як и аматере керестурского Дому култури.
Дом култури Руски Керестур на Фестивалє на нєдзелю участвує з двома шпивацкима ґрупами – Дзивоцку и Хлопску, Тамбуровим оркестром и Танєчну ґрупу ветеранох.
Попри уметнїцкей програми, часц Фестивалу и виробки старих ремеслох, та традицийни єдла националних заєднїцох у Войводини, хтори буду виложени на штандох у голу ЦФК.