ШИД – З нагоди 6. децембра, Дня ошлєбодзеня Шиду и Дня општини Шид, вчера отримана Шветочна схадзка Општинского одбору Здруженя борцох Народно-ошлєбодительней войни на хторей предсидатель борецкей орґанизациї Сава Рошич гварел же борци вше буду пестовац традициї Народно-ошлєбодительней войни, бо Шидянє дали числени жертви за шлєбоду.
Предсидатель Покраїнского одбору Здруженя борцох НОВ Войводини Светомир Атанацкович гварел же ше шлєбоду муши пестовац и чувац и поручел же нїхто нє ма право иншак толковац историйни факти и нароодно-ошлєбодительну борбу.
На схадзки бешедовали и представителє борецких орґанизацийох зоз Сримскей Митровици и Индїї, а борцох привитал и предсидатель Општини Шид Предраґ Вукович.
У културно-уметнїцкей часци програми на Шветочней схадзки наступели школяре Ґимназиї „Сава Шуманович“ зоз Шиду и поетове Светислав Ненадович и Веселин Вучкович.
По схадзки на Спомин-костурнїцу на городским теметове венци положели представителє локалней самоуправи и борецких орґанизацийох Шиду, Покраїни, Сримскей Митровици, Индїї и Ердевику. Венци положели и представителє Руху социялистох и ОО СПС, як и Одряду горякох „Лазар Бибич“, а после кладзеня венцох священїки Сербскей православней церкви служели парастос за погинутих борцох НОВ.
Венци положени и на Спомин-плочу погинутим борцом на будинку Културно-образовного центру у Шидзе.
