РУСКИ КЕРЕСТУР – Вчера, на швето Св. Миколая, у Катедралним храму отримана Архиєрейска Служба Божа и Крачунска споведз котра ше, иншак, традицийно отримує на швето Непорочного зачатия Пресвятей Богородици, алє є того року винїмково преруцена.
Службу Божу предводзел епископ Георгий Джуджар, а сослужели о. Владислав Рац, о. Владимир Еделински Миколка и о. Алексий Гудак.
Окремни акцент у казанї кир Георгий дал на нове виданє цалосного прекладу Святого писма на руски язик, визначуюци значенє того Божого слова, слова на живот вични. Бог до нас прегваря на нашим язику и прето тото виданє винїмково значне за духовни живот нашого народа.
Пред и под час Служби споведали о. Яков Кулич, о . Владислав Варґа, о. Дарко Рац, о. Иґор Вовк и о. Платон Салаґ ЧСВВ, та ше шицки вирни мали нагоду висповедац.
