Школярски парламент Основней школи „Петро Кузмяк” з Руского Керестура у другим школским полрочю порушал нову активносц – кажди мешац пошвецени визначовац и преглїбиц єдну тему. Так мешац марец пошвецени добрим дїлом.
Як дознаваме од педаґоґинї Мариї Шантовей, тоту идею вигласали парламентарци Основней школи, потримала ю директорка Хелена Пашо Павлович и Наставнїцка рада, а придружел ше и парламент Штреднєй школи.
– Прилапели зме їх предкладаня же би ше за кажди мешац вибрало обробиц и представиц шицким єдну одредзену тему, бо то окрем активованя школярох и наставнїкох ма и свой воспитни аспект, хтори иншак хиби у школскей системи – толкує Шантова.
Предложене же би ше до тей активносци уключел хто як жада, и школяре у предлуженим пребуваню, и учительки у нїзших класох, и други по своїм опредзелєню и можлївосцох. Попри Шантовей у акцийох ше найвецей анґажує и учителька Славка Гайдук и наставнїца Златица Малацко.
Так у януару школяре вибрали роздумовац о здравей поживи, фебруар бул мешац красних словох, марец будзе пошвецени добрим дїлом, април мешац култури, май мешац спорту, а юний мешац нєзвичайних ручних роботох.
– О здравей поживи найвецей було бешеди у предлуженим пребуваню дзе з дзецми роби Славка Гайдук, а за мешац фебруар – мешац красних словох, виробени панои и поставени су у школским голу. Попри тим, кажди наставнїк тему обрабя у рамикох своїх порядних активносцох зоз школярами – толкує Шантова.
У наступаюцим мешацу марцу хтори пошвецени теми добрих дїлох, парламент предложел же би ше отримало єдну роботню, а як дознаваме од педаґоґинї Любици Нярадийовей, парламент Штреднєй школи ше придружує так же орґанизує Акцию добродзечного даваня креви за матурантох.
На своїх схадзкох школярски парламент вєдно з наставнїками випланує активносци и за кажди шлїдуюци мешац, на теми хтори вибрали, обчекую же ше до акцийох уключа и цо вецей школяре и наставнїки.