ПЕТРОВЦИ – У орґанизациї Дружтва Руснацох у Републики Горватске „Руснак”, на ютре, 19. септембра, у Петровцох будзе отримана Културна манифестация (КМ) „Кед голубица лєцела”.
Як наявене, Манифестация у Доме култури почнє з Фото-виставу „Русинске народне облєчиво Пряшовского краю”, етнолоґа Ивана Чижмара зоз Словацкей, а потим на бини Дому култури на културней програми наступя шпиваче и шпивацки ґрупи културно-уметнїцких дружтвох „Яким Гарди” з Петровцох, „Яким Ґовля” з Миклошевцох, Руснацох Осиєк, Дружтва „Руснак” з Петровцох, та шпиваче, поетове и рецитаторе з Руского Керестура, Братислави (Словацка) и Мукачова (Україна).
Отверанє вистави будзе на 19, а културна програма на 19,30 годзин.
У рамикох Манифестациї на нєдзелю, 20. септембра, у петровскей церкви Покрову Пресвятей Богородици на 10 г. будзе Служба Божа, а КМ „Кед голубица лєцела” буду провадзиц и члени Шветовей ради Руснацох/Русинох/Лемкох и Форуму русинскей младежи.
Манифестацию ше отримує под покровительством Совиту за национални меншини Републики Горватскей и зоз сопокровительством соборского заступнїка за национални меншини Велька Кайтазия, општинох Боґдановци и Стари Янковци, Ради рускей националней меншини Городу Вуковар и Представителя рускей националей меншини Городу Заґреб.