На ютре Медзиокружне змаганє з руского язика

автор маф
1k Опатрене

КОЦУР – У Основней школи „Братство єдинство” у Коцуре на ютре, 3. априла, будзе Седме Медзиокружне змаганє з руского язика и язичней култури за школярох основних школох. Буду ше змагац 73-йо школяре – 43-йо з порядней и 30-еро з виборней настави, а пласман на Медзиокружне виборели на школских змаганьох отриманих у фебруаре.

У катеґориї порядней настави змагаю ше школяре з Руского Керестуре, Дюрдьова и домашнї з Коцура, а у катеґориї виборней настави школяре з Нового Саду, Ветернику, Сримскей Каменїци, Кули, Вербасу, Савиного Села, Нового Орахова, Бачкей Тополї, Шиду, Бачинцох и Сримскей Митровици.

Сход змагательох на 8,30, отверанє змаганя на 9,30 годзин, а од 10 до 11,30 годзин школяре буду ришовац тести. Резултати змаганя и преглашенє побиднїкох плановане од 14,30 до 15 годзин.

Орґанизатор змаганя Дружтво за руски язик, литературу и културу, вєдно з домашню Школу „Братство єдинство”, а змаганє ше отримує по календаре Министерства просвити, науки и технолоґийного розвою.

ПОВЯЗАНИ ТЕКСТИ