РУСКИ КЕРЕСТУР – На ютре, 18. новембра, почина 23. Културна манифестация „Костельникова єшень” (КМ КЄ), будзе тирвац по 26. новембер, а програми Манифестациї буду у Руским Керестуре, Кули, Дюрдьове и Коцуре.
КМ КЄ на ютре почнє у Основней и штреднєй школи з домом школярох „Петро Кузмяк” з промоцию нових кнїжкох за дзеци, и других у виданю „Руского слова”, школяром основней и штреднєй школи, а промоциї отворени за шицких заинтересованих. Промоциї у Школи почню на 11,30 годзин.
На ютре вечар на 18,30 г. у Ресторанє „Червена ружа” будзе централна програма тогорочней Манифестациї, на хторей буду представени шицки нови кнїжки „Руского слова”, а у истим просторе будзе и вистава „Приватни живот Руснацох” автора Сашу Сабадоша и Заводу за културу войводянских Руснацох.
На ютрейшей програми госц КЄ будзе сербски поета др Зоран Дєрич з Нового Саду, тиж и есеїста, прекладатель, професор, тераз окончователь длужносци директора Сербского народного театру у Новим Садзе.
