КОЦУР – На ютре, 10. юлия, у Коцуре почнє Фестивал фолклору Руснацох и других националних заєднїцох „Коцурска жатва 2015”. У рамикох тогорочней „Жатви” будзе означена и 25-рочнїца снованя Културно-уметнїцкого дружтва „Жатва”, (основане є 1990. року), та часц провадзацих програмох будзе пошвецена тому ювилею.
„Коцурска жатва” ютре почнє з першу провадзацу програму – Благодарну Службу Божу на чесц 25-рочнїци КУД „Жатва”, хтора будзе на 18,30 годзин у Грекокатолїцкей церкви.
На 20 годзин у Етно-клубу „Одняте од забуца” будзе шветочно отворени тогорочни Фестивал, як и вистава фотоґрафийох з його прешлосци, автора Райка Шолая, а потим у дворе Етно-клубу будзе отримана музично-литературна промоция трох руских виданьох – „Осце и черешнї” Агнети Папгаргаї, „Слово Бояна Двокраяна” Владимира Бесерминя и „Галов” Ирини Гарди Ковачевич.
На ютре на 22 годзин, на площи опрез Дому култури почнє друженє за младих наволане „Тамбуранє”, на хторим нащивительох будзе забавяц популарни тамбурови оркестер „Коцурски бетяре”.
На соботу, 11. юлия, опрез Основней школи „Братство-єдинство” на 17 годзин наступя наймладши учашнїки Фестивалу, а представя ше дзецински ансамбли КУД „Завичайне врело” и КУД „Жатва” з Коцура, та КУД „Петро Кузмяк” з Нового Орахова.
На 18 годзин у физкултурней сали ОШ будзе отворена вистава фотоґрафийох з нагоди 25-рочнїци КУД „Жатва”, а на 19 годзин буду понукнути етно-лакотки з руских, сербских и мадярских етно-столох, хтори пририхтую Актив женох КУД „Жатва” и Секция женох з КУД „Сирмаи Кароль” з Вербасу.
У Доме култури на 21 годзин почнє Фестивал фолклору Руснацох и других националних заєднїцох, на хторим участвую ансамбли з Руского Керестура, Вербасу, Шиду, Дюрдьова, Нового Орахова, Миклошевцох и Коцура, а як госци вечару наступя члени КУД „Др Младен Стоянович” з Младенова и КУД „Сирмаи Кароль” з Вербасу.