На ютре пошвецанє Пасторалного центру и „Пришли нам Русадля”

автор влдї
958 Опатрене

БИКИЧ – На ютре, 31. мая, на Русадля по юлиянским календаре, апостолски егзарх за грекокатолїкох у Сербиї кир Георгий Джуджар на 11 годзин у церкви у Бикичу будзе служиц Архиєрейску Службу Божу, а потим зоз священїками пошвеци Пасторални центер у тим месце, чия вибудов закончена тей яри.

Ютре у Бикичу будзе и традицийна манифестация „Пришли нам Русадля”, хтора почнє на 14 годзин з отвераньом вистави у Етно-хижи и отвераньом штандох хтори порихтую жени з вецей здруженьох у шидскей општини.

На 14,30 г. у Доме култури будзе концерт, на хторим наступя домашнї КПД „Иван Котяревски”, та госци зоз Шиду – з КПД „Дюра Киш” и з Бачинцох, з КПД „Драґутин Драґен Колєсар”.

По концерту, на 16 г. будзе традицийне валанє (рубанє) „майского древка” опрез Дому култури, а потим друженє домашнїх и госцох.

Бикичанє на манифестацию обчекую приход представительох Националного совиту Руснацох, локалней самоуправи и госцох зоз Словацкей Републики, з Бардейова и Стебнику.
Пред ютрейшим пошвецаньом, Бикичанє зоз своїм парохом о. Владимиром Еделинскийом Миколком тих дньох ушорели простор коло Пасторалного центру.

ПОВЯЗАНИ ТЕКСТИ