На ютре схадзка Скупштини АП Войводини

автор сен
865 Опатрене

НОВИ САД – За ютрейшу схадзку Скупштини Автономней покраїни Войводини (АПВ) предвидзени 15 точки дньового шору. Будзе бешеди о просторних планох за окремни намени за дзепоєдни подруча у Войводини, о розвою информацийно-технолоґийного сектору, як и о националних меншинох, односно националних заєднїцох.
Покраїнски посланїки буду розправяц о предлогу Покраїнскей скупштинскей одлуки о покладаню примацого испиту, односно испиту за преверйованє способносци за упис на високошколску установу на язикох националних меншинох-заєднїцох.
Додзельованє средствох орґаном и орґанизацийом дзе службене хаснованє язикох и писмо националних меншинох-заєднїцох, та додзельованє буджетских средствох орґанизацийом националних меншинох-заєднїцох тиж буду теми о хторих ше будзе розправяц на ютрейшей схадзки, як и о финансованю националних меншинох-заєднїцох. Финансованє и софинансованє програмских активносцох и проєктох у обласци основного и штреднього образованя и стандардох у АПВ будзе тиж єдна з темох схадзки Скупштини АПВ.
Предвидзене же посланїки буду розправяц и о програми унапредзеня социялней защити у Покраїни, та о менованю членох покраїнского Совиту за безпечносц.

ПОВЯЗАНИ ТЕКСТИ