КОЦУР/РУСКИ КЕРЕСТУР – Вифлеємски огень мира на ютре сцигнє до наших парохийох у Коцуре и Руским Керестуре. У Коцуре огень дополадня будзе принєшени до Манастиру шестрох служебнїцох, а до Керестура до Катедралней церкви по Вечаршей Служби Божей, хтора на 17 годзин.
З того огня вирни можу запалїц швичку и однєсц ю до свойого дому, нє лєм на ютре, алє и други днї, по сам Крачун. Гоч ше и загаши, швичка уж будзе пошвецена и може пренєсц Вифлеємски огень до домох и гориц на Крачун, алє и у других окремних нагодох, лєбо потребох у фамелиї.
Вифлеємски огень мира, хтори символ Исуса Христа и любови, мира и злагоди, з Вифлеєму до наших крайох уж други рок приноши Скаутска орґанизация „Пластуни” з України, зоз Закарпатя, а скаутски орґанизациї го розноша по велїх жемох Европи.