КОЦУР – Полицийна станїца Вербас, у сотруднїцтве з Општинским совитом за безпечносц транспорту на драгох, Аґенцию за безпечносц транспорту, Авто-мото союзом Сербиї и Аґенцию за консултованє и менаджмент „Н&М”, орґанизує едукацию за польопривреднїкох з назву „Полиция у заєднїци”. Едукация будзе на ютре, нєдзелю, на 11,15 годзин у велькей сали Месней заєднїци Коцур.
На едукациї будзе бешеди о безпечним участвованю тракторох и роботних машинох у транспорту, як и о защити при їх хаснованю. Теми буду и нєдостаточна ошвиценосц, управянє з наведзенима катеґориями под уплївом алкоголу, наруцованє блата на драгу, та калїченя у роботи зоз роботнима машинами.
Орґанизаторе поволую шицких польопривреднїкох, представительох польодїлских задруґох и подприємствох хтори ше занїмаю з польопривреду же би присуствовали на преподаваню, хторе у єдней часци будзе и по руски.