На ютре у Новим Садзе Коло за Ґиниса

автор зам
750 Опатрене

НОВИ САД – На ютре, 4. октобра, у Новим Садзе будзе отримана Манифестация „Вельке коло за Ґиниса”, на хторей члени културно-уметнїцких дружтвох, уметнїки и други гражданє аж з 11 державох попробую обориц Ґинисов рекорд у танцованю найдлугшого кола на швеце и так войсц до Ґинисовей кнїжки рекордох.

Як пред отримованьом Манифестациї поведзене на конференциї за новинарох, участвованє потвердзели вецей як 12 000 танєчнїки, медзи нїма и з Руского културного центру у Новим Садзе.

Як гварела предсидателька Скупштини Городу Нови Сад Єлена Црноґорац, пририхтованє за „Вельке коло за Ґиниса” тирва скоро рок, а орґанизує го Здруженє „Вельке коло”, з чим Нови Сад будзе зазначени и як културно-уметнїцки центер реґиону. Визначела и же Манифестация од самого початку ма вельку потримовку Городу и городоначалнїка Милоша Вучевича, та городских управох, полициї, Червеного крижу, а у нєй участвую и числени волонтере.

2-Kolo-02

„Вельке коло за Ґиниса” будзе на Новим населєню исц по Булеваре Европи, по Футожскей драги, Булеваре княза Милоша и Булеваре войводи Степи, а танєчнїки оформя коло длуге 6 километри. Дотерашнї рекорд трима коло з 250 учашнїками, так же новосадски рекорд будзе скоро нєдосцигуюци, гварел з тей нагоди предсидатель Здруженя „Вельке коло” Милан Веселинович.

Як наявене, танцованє Велького кола, составеного з „Бачкого кола”, „Катанки” и „Ужичкого кола”, танєчнїки у народних облєчивох почню на 15 г., а пред тим, уж на 11 г. на 27 локацийох у городзе културно-уметнїцки дружтва буду танцовац рижни хореоґрафиї.

Манифестация будзе предлужена и после одтанцованого кола з концертами на бини коло Ґеронтолоґийного центру на Новим населєню, а ма и гуманитарни характер.

Пре „Вельке коло за Ґиниса” на ютре спрам и з Нового населєня будзе пременєни розпорядок воженя автобуских линийох 2, 7, 8, 9, 52, 53, 54, 55 и 56 городского явного превозу.

ПОВЯЗАНИ ТЕКСТИ