РУСКИ КЕРЕСТУР – У Руским Керестуре на ютре, 5. децембра, будзе отримана шеста порядна схадзка Националного совиту (НС) Руснацох у тим зволаню. Схадзка будзе на 10 г. у просторийох Дому култури.
На ютрейшей схадзки НС перше констатує мандат свойому новому членови – Борисови Фейдийови, студентови з Коцура, з лїстини „Млади за будучносц”, понеже дотерашнї член з тей лїстини Микола Медєши дал задзекованє на членство у Совиту.
На дньовим шоре прилапйованє Плану роботи и Финансийного плану НС за 2016. рок, даванє думанє о вименки Финансийного плану Заводу за културу войводянских Руснацох (ВР) за тот рок, та думаня о Програми роботи и Финансийним планє Заводу за наступни рок. На дньовим шоре схадзки и даванє согласносци на План роботи и Финансийни план НВУ „Руске слово” за 2016. рок, як и приношенє Одлуки о вименки Одлуки о снованю НВУ „Руске слово”.
Як соснователь и снователь, НС на ютре перше розриши, а потим и менує нових членох до Управного (УО) и Надпатраюцого одбору (НО) Заводу за културу ВР, як и до УО и НО Руского народного театру „Петро Ризнич Дядя”, а на основи думаня Одбору за културу НС. Тиж так, на ютре би мал буц меновани и член до УО НВУ „Руске слово” з представительох занятих.
Точки дньового шору и починанє явней розправи о додзельованю припознаньох визначним Руснацом за їх доприношенє рускому народу, як и починанє поступку за доставанє радио-фреквенциї за информованє по руски на локалним уровню, та потвердзованє вецей одлукох принєшених на ВО НС.