НОВИ САД – У виданю НВУ „Руске слово” тих дньох вишла ище єдна нова кнїжка за дзеци – сликовнїца Михайла Ковача „Челядз дринкова”, хтору богато илустровала Ґорана Бильня. У сликовнїци илустровани три познати Ковачово приповедки за дзеци: „Розход з мацеру”, „Космонавт” и „Челядз дринкова”
З тоту сликовнїцу ше указує же добри писатель за дзеци, яки Михайло Ковач, актуални и у нєшкайшим чаше, кед дзецинска перцепция иншака як пред двацец, трицец, лєбо пейдзешат роками, алє остала иста потреба за мрию и твореньом свойого дзецинского швета.
Млада илустраторка, академска малярка Ґорана Бильня у тей сликовнїци указала свою инвентивносц у розбавеносци фарбох, їх интензитету пре активну учасцу у твореню богатого дзецинского швета.
Кнїжка кошта 400 динари, а мож ю купиц прейґ сайту „Руского слова” (www.ruskeslovo.com/shop), як и у „Руским слове” у Новим Садзе и Дописовательстве „Руского” у Руским Керестуре.
Кнїжка вишла праве пред шветами (Миколая по юлиянским календаре), та крачунскима шветами и Новим роком, и будзе красни дарунок дзецом у пакецикох.