НОВИ САД – У виданю НВУ „Руске слово” вчера вишла кнїжка Ирини Гарди Ковачевич „Галов” – кнїжка критикох, приказох и рецензийох, у хторей авторка на вецей як 400 бокох облапела часц нашей литературней творчосци за скоро пейц децениї.
У шейсцох обласцох друковани прикази кнїжкох наших авторох хтори обявйовани у нашей преси, а найстарши текст зоз 1968. року – приказ кнїжки писньох Дюру Папгаргая „Ту, такой при шерцу”. У ґрупи текстох з назву „Прегляди”, Гарди Ковачевичова пише о културних феноменох при Руснацох, ту и часц о „Рочнїцох”, та „Рецензиї”.
Окремну увагу авторка пошвецела „Литератури за дзеци” и „Подобовому животу Руснацох”.
Послеслово за кнїжку „Галов” написал Микола Шанта, а промоция тей новей кнїжки з нашей Установи була вчера на Салонє кнїжкох у Новим Садзе.