Шестра Мартина Кмита вибрана за нову провинциялну настоятельку Провинциї св. Йосифа шестрох служебнїцох Непорочней Дїви Мариї зоз шедзиском у Руским Керестуре.
Ш. Мартина вибрана на виборней Капитули Провинциї хтора отримана од 11. по 13. авґуст у доме за духовни вежби Домус Пацис у Горґошу, дзе участвовали 18 шестри. Вони тиж вибрали и штири настоятельково совитнїци: ш. Миколая Степась, ш. Єремия Годис, ш. Емилия Сабадош и ш. Мария Пелих.
Нова провинциялна настоятелька ш. Мартина вибрана на пейцрочни мандат и на тим месце заменєла потерашню настоятельку ш. Веронїку Гралюк. Ш. Мартина родом з України зоз Львовскей обласци з места Велики мости. Народзена є 1977. року, а до монашеского чину шестрох Служебнїцох ступела 8. юния 1997. року. За тот час окончовала длужносци учительки у новицияту, була совитнїца провинциялней ш. Веронїки, а остатнї час и провинциялна економка.
Провинциялни дом шестрох Служебнїцох ше находзи у манастире у Руским Керестуре, а до Провинциї
св. Йосифа окрем штирох манастирох у Сербиї (Керестур, Коцур, Кула и Нови Сад) спадаю и штири манастири у України (Ужгород, Мукачево, Усть Чорна и Виноградово), а тиж и манастир у Баня Луки у Републики Сербскей. Шестри з тей провинциї, хторих тераз єст 48, свойо служенє витворюю и у мисийох у Горватскей, у Заґребе у владическим доме, у Нємецкей, дзе шестри служа на єдней парохиї и у владичестве у Минхену, а тиж и у Риме, дзе шестри робя у румунскей грекокатолїцкей семинариї.