НОВИ САД – Вчера вишло марцовске число младежского часопису МАК, а у нїм „У фокусу” „полерка” Ивана Ловас з Футоґу, музичаре Марко и Ана Радишичово з Дюрдьова, як и Конкурс Роботного цела за младеж Националного совиту Руснацох.
У „МАК-овим колажу” информациї о тим яки условия и як ше мож приявиц за участвованє на Трецей науковей конференциї младих науковцох и фаховцох, рубрика „Дакеди и нєшка” пише о Пасхи, а з тей нагоди у рубрики „Направ сам” мож научиц як виробиц украсну писанку з темперами.
Кед ше и читачом поспиши направиц даяку украсну писанку з темперами, по 5. май можу послац єй фотоґрафию на е-адресу mak.magazine@gmail.com, а МАК наградзи два найкреативнєйши.
„Спорт и рекреация” пише о драги фодбалера Любомира Фейсу од „Гайдуку” по „Бенфику”, а „Куцик совитох” о тим як найлєпше учиц. У МАК-у, медзи иншим, мож пречитац и поезию, ришиц тест, а од того числа упознац и младих хторим фотоґрафия гоби.