БЕОҐРАД – На своєй остатнєй схадзки у тим зволаню Скупштина Сербиї того тижня принєсла Закон о занятих у автономних покраїнох и єдинкох локалней самоуправи. Министерка за державну управу и локалну самоуправу Кори Удовички гварела же циль Закона професионализованє и деполитизованє занятих у автонимних покраїнох и локалних самоуправох, а нови предписаня ше почнє применьовац 1. децембра того року.
Як визначела Кори Удовички, службенїки буду професионалци у управи на локалним уровню, а буду постояц и функционере.
Закон предвидзує уводзенє службенїцкей системи по углядзе на орґани державней управи. У нїм велї новосци, як цо то Кадрови план, хтори прилапює скупштина општини, чи городу, пре планованє кадрох у складзе з розполагаюцима средствами у буджетох.
Новосц и уводзенє подробно ушореного конкурсного поступку за обезпечованє роботи и оценьованє службенїкох по предписаньох за державних службенїкох. З управами буду руководзиц службенїки на положеню, а одредзени роботни места у автономних покраїнох поставаю положеня. Уводзи ше и можлївосц поставяня окончователя длужносци началнїка, чого дотераз нє було.
По новим законє унапредзени и дисциплински поступок за службенїкох, а буду сновани и совити за фахове усовершованє занятих у локалних самоуправох.