СЕРБИЯ – Правилнїк о декларованю, означованю и рекламованю продуктох усоглашени з одредбами жемох Европскей униї (ЕУ), та од нєшка продукователє, а окреме вивожнїки, муша мерковац же би на продукту у декларациї ясно назначели його состойки, походзенє, цену и час тирваня.
Правила єст вельо, а окрем наведзених, Правилнїк обовязує каждого продукователя же би назначел присуство алерґентох у шицких продуктох, та и у єдзеню хторе ше предава и понука у погосцительних обєктох. Состойки хтори можу виволац алерґийски реакциї треба наглашиц з иншаким випатрунком буквох, або фарбу.
Гоч Сербия ище вше нє членїца ЕУ, шицки продукователє поживових продуктох хтори вивожа муша ускладзиц свойо декларациї з правилами хтори предвидзує тота реґулатива. У процивним, їх продукти годни буц застановени на гранїцох, або врацени зоз жемох ЕУ, а за тих котри нє буду почитовац нови правила, предвидзени пенєжни кари.