БЕОҐРАД – Уния синдикатох просвитних роботнїкох Сербиї (УСПРС) оценєла же нови правилнїки о финансованю основних и штреднїх школох нє у складзе з реалнима потребами, понеже предвидзує зменшованє числа дефектолоґох и психолоґох, библиотекарох, фахових сотруднїкох, помоцних и административних роботнїкох.
– Шпорованя хтори держава витвори з їх применьованьом буду лєм символични у одношеню на чкоду, понеже ше з новима правилнїками зменша квалитет роботи у школох – сообщене з Униї, хтора указую и на тото же ше зменшованє фахових роботнїкох запровадзує праве у чаше кед єст вельке число школярох з проблематичних фамелийох, а насилство у школох вше заступенше.
– Найгорше цо предвидзую нови правилнїки то зменшованє числа дефектолоґох и психолоґох у школох. Парадоксалне же ше то роби паралелно з гласну промоцию инклузивного образованя, та ше до наших школох уписує дзеци з рижнороднима файтами почежкосцох у розвою, од озбильних здравствених дияґнозох по поремеценя у справованю, а о нїх ше можу старац лєм учителє – пише у сообщеню УСПРС.