ЗАҐРЕБ – У Влади Републики Горватскей (РГ) 10. новембра отримана 70. схадзка Совиту за национални меншини РГ, на хторей главна тема бул Предлог критериюмох за финансованє и догварка о програмох културней аутономиї националних меншинох. Тиж бешедоване и о методолоґиї провадзеня и вреднованя финансованих програмох националних меншинох, дознава Рутенпрес од члена Совиту за национални меншини РГ Звонка Костелника з Петровцох.
На препоруку Министерства финансийох и Державного уряду за ревизию, по тих критериюмох реґуловани одношеня зоз здруженями, їх союзами и заєднїцами меншинох зоз Совитом за национални меншини РГ, предвидзене и розтаргованє контракту о финансийней потримовки, а час же би ше даєдно здруженє почало финансовац з державного буджету звекшани на 36 мешаци. Як потолковал Костелник, то значи же здруженє, лєбо КУД, саме муши робиц и доказовац ше 36 мешаци и аж потим може конкуровац за конкурси хтори розписує держава.
Совит до своїх критериюмох о финансованю уключел и дополнєня, як цо то дошлєбодзени лимит по файти трошкох за кажду програму окреме, одредбу о суми за виплацованє плацох занятих, о контрактох о дїлу и авторских гонорарох, реґулованє врацаня средствох за нєвитворйованє обовязкох по контрактох, та о преношеню средствох до идуцого року.