ВЕРБАС – На жридлу водоводу у Вербаше тих дньох поставени два нови пумпи, цо обезпечи ище сиґурнєйше подмирйованє з воду и ушпорованє електричней енерґиї за коло 15 одсто.
Ґу тому, шицки жридла води и значни точки канализацийней мрежи тераз повязани з диспечерским центром, одкаль ше контролує цалу систему пририхтованя и дистрибуциї води, як и уровень трошеня и одцеканє одрутних водох.
Заменїк предсидателя општини Вербас Милан Ґлушац визначел же локална самоуправа дотераз видвоєла 6 милиони динари за поставянє нових пумпох и автоматизацию построєня, а намира обезпечиц ище квалитетнєйшу и сиґурнєйшу дистрибуцию води за хасновательох.
Роботу автоматизованого построєня госцом з Општини представел руководитель Роботней єдинки „Водовод и канализация” Мирослав Фейса.